fešta
Najstariji stanovnike Općine Barban ove subote slavi 103. rođendan
Ilustracija (Pexels)
Najstariji stanovnik Općine Barban, Dušan Medančić iz Medančići, ovog petka, 11. travnja, slavi 103. rođendan. Proslava će se održati u Društvenom domu Sutivanac s početkom u 17 sati.
Gospodin Medančić opisao je ukratko svoj dugi život.
- Rojen san tu, u ovoj kući u Medančićima, za vrime kad su tu bili Talijani, 11. avrila miljardevetsto-dvajsetdrugega leta. Ditinjstvo i mlados san proživi tu u selu Medančići i po Sutivancu u fameji oca i matere i nas devet brati i sestar. Va školu su me popeljali kad san ima nanke sedan let, dvajsetosmega (1928.) leta. Škola nan je bila u staroj Plovaniji, u selu Cvitići, kadi je i moj otac Martin pred trejset let fini tri klaše hrvacke pučke škole.
Pokle škole sam s famejon dela va kampanji, čuva blago i dela se ča je rabilo poli kuće i u selu. U talijansku vojsku su me pozvali kvarnar i drugega (1942.) leta.
Prvih par miseci smo bili u Toscani. Kasarna nan je bila u gradu Arezzo, grad nešto veći od naše Pule. Onda su nas poslali na Siciliju, kadi je bila američka fronta kvarnar i tretega (1943.) leta. Tu su nas Amerikani zarobili i dali nas va Afriku, Alžir u logor, žica visoka pet metri. Tu smo bili skupa s njemačkim zarobljenicima.
Onda nas je kvarnar i četrtega (1944.) leta preuzela ingleška vojska i brodom skroz Gibraltara i priko Atlantika dopeljala u Liverpul va Ingleškoj. Tu smo bili do kvarnar i šestega (1946.) leta, Tamo smo delali i bili slobodni po gradu. U fabriki smo krcali municiju. Delali smo i u kampanji, imali smo i kombajne.
Sedmog miseca kvarnar i šeste (srpnja 1946.) došli smo doma. Brodom priko La Manša i dalje željeznicom do Trsta, i makinom do Kanfanara i od tuda na noge doma u Sutivanac. Doma su bili otac i mat, i braća Ivan, Milio, Frane, Đulio, sestre Ana i Marija.
Od kvarnar i šeste (1946.) dalje je bi samo rudnik Raša. Poša san delat u kavu. Peljali su nas kavaricon. To je bi kamion s kasunon, vrata i škalini ozad. U kavi san bi pet let. Pak je došla eksplozija gasa i bi san malo ranjen.
Dalje san dela vani, kao strojar, većinom u Krapnu i po svuda kamo su me poslali. I tako san u Raši dela do penzije miljardevetstosedandeset i osmega (1978:) leta, kada san ima pedeset i četiri (54) leta, prisjetio se Medančić.
Povezane vijesti
Podijeli: Facebook Twiter
